Франция ташқи ишлар вазири Жан-Ноэл Барро Гренландия масаласига изоҳ берар экан, орол Европа ҳудудининг бир қисми экани ва НАТО ҳимояси остида эканини таъкидлади. Унинг сўзларига кўра, альянсга аъзо европалик давлатлар ўз ҳудудини ҳар қандай ташқи таҳдиддан тўлиқ ҳимоя қилиш салоҳиятига эга. Бу ҳақда The Guardian нашри хабар бермоқда.
Бу баёнот Дания бош вазири Метте Фредериксеннинг Гренландия мудофааси бутун НАТО учун умумий масала эканини айтган фикрлари фонида янгради. Сўнгги кунларда Франция, Германия, Буюк Британия, Норвегия ва Швеция ҳарбий хизматчилари Дания бошчилигида ўтказилаётган қўшма машғулотлар доирасида Гренландияга етиб бора бошлади. Дания ҳукумати ҳам оролдаги ҳарбий иштирокни кучайтиришини маълум қилди.
Вазият АҚШ президенти Доналд Трампнинг Гренландияни миллий хавфсизлик нуқтайи назаридан стратегик ҳудуд сифатида баҳолаб, уни назорат қилиш зарурлиги ҳақидаги аввалги баёнотларидан кейин кескинлашди. Вашингтонда ўтказилган учрашувларда Дания ва Гренландия ташқи ишлар вазирлари АҚШ расмийлари билан музокаралар олиб борди, бироқ томонлар ўртасидаги келишмовчилик сақланиб қолмоқда.
Гренландия бош вазири Енс-Фредерик Нилсон орол «сотилмаслиги»ни, АҚШ таркибига кирмаслигини ва Дания қироллиги ҳамда НАТОнинг бир қисми бўлган демократик ҳудуд эканини яна бир бор таъкидлади. Европа етакчилари эса Арктика минтақасида хавфсизликни мустаҳкамлаш Европа ва Шимолий Америка учун муҳим стратегик аҳамиятга эга эканини қайд этмоқда.