Гватемалада 30 кунлик фавқулодда ҳолат эълон қилинди

 

Гватемала ҳукумати мамлакатда тўдалар зўравонлиги кучайгани сабабли фавқулодда ҳолат эълон қилди. Бу қарор сўнгги кунларда қамоқхоналарда юз берган тартибсизликлар ҳамда саккиз нафар полиция ходимининг ҳалок бўлиши ортидан қабул қилинди, дея хабар бермоқда The New York Times.

 

Президент Бернардо Аревалонинг маълум қилишича, фавқулодда ҳолат 30 кун давом этади. Миллий полиция ҳамда армияга тўдалар ва уюшган жиноятчиликка қарши қатъий чоралар кўриш ваколати берилади. У якшанба куни ўтказилган матбуот анжуманида ушбу чоралар аксарият аҳоли ҳаётига таъсир кўрсатмаслигини, бироқ профилактика мақсадида душанба куни мактаблар фаолияти вақтинча тўхтатилганини билдирди.

 

Шанба куни мамлакат бўйлаб учта қамоқхонада маҳбуслар томонидан тартибсизликлар уюштирилиб, ўнлаб қамоқхона қўриқчилари гаровга олинган. Ички ишлар вазирлиги ушбу воқеалар мувофиқлаштирилган ҳолда амалга оширилганини ва бу расмийларнинг жиноий гуруҳлар етакчиларини айрим имтиёзлардан маҳрум этиш қарорига жавоб эканини таъкидлади. Якшанба куни ҳуқуқ-тартибот идоралари қамоқхоналарда назоратни қайта тиклаган ва гаровга олинган шахслар озод этилган.

 

Миллий полиция маълумотларига кўра, якшанба куни саккиз нафар полиция ходими ҳалок бўлган. Расмийлар ушбу ҳужумлар ортида тўдалар турганини билдирар экан, президент Аревало бу ҳужумларни қамоқхоналар устидан назоратни қайта қўлга олишга жавобан амалга оширилган қасос сифатида баҳолади.

 

Президент, шунингдек, мамлакатда зўравонлик тўлқинини келтириб чиқараётган гиёҳванд моддалар билан шуғулланувчи жиноий гуруҳларга қарши курашда АҚШ Федерал қидирув бюроси ва бошқа Америка агентликлари билан ҳамкорлик қилиш режалаштирилаётганини маълум қилди. Унинг айтишича, қамоқхона тизимидаги кенг тарқалган порахўрлик ва коррупция жиноий тўдаларнинг кучайишига сабаб бўлмоқда.