Фарғонада банк ходими мижозни ўлдиргани аниқланди

Фарғонада автокредит расмийлаштирмоқчи бўлган фуқаро банк ходими томонидан ўлдирилди. Бу ҳақда Kun.uz хабар берди.

Дастлабки маълумотларга кўра, С.Э. жорий йилнинг 31 март куни автокредит расмийлаштириш мақсадида Қўқон шаҳридаги банклардан бирига борган ва шундан сўнг бедарак йўқолган. Яқинларининг билдиришича, у банк биносини ходимлардан бири билан бирга тарк этган, бироқ орадан икки соат ўтиб ходим ёлғиз қайтиб келган.

 

Маълум қилинишича, Бош прокуратура ахборот хизмати терговга қадар текширув давомида Қўқон шаҳридаги банклардан бирининг кредит бўлими мутахассиси А.Т. гумонланувчи сифатида қўлга олинганини билдирган. У мижозни ўлдириб, жасадни Катта Фарғона каналига ташлаб юборганига иқрор бўлган.

 

Гумонланувчининг кўрсатмаларига кўра, С.Э. банк филиалига акция доирасида автокредит олиш учун келган. Улар ўртасида тортишув юзага келган ва кейинчалик масалани муҳокама қилиш учун гумонланувчининг автомашинасида йўлга чиқишган. Ўзбекистон тумани “Тараққиёт” МФЙ ҳудудида автомобиль ичида гумонланувчи ошхона пичоғи билан фуқаронинг бўйин қисмига бир неча бор зарба бериб, уни ўлдирган.

 

Шундан сўнг у иш жойига қайтиб келиб, жасадни машинада қолдирган. Банк ходими тахминан соат 19:00 гача ишда бўлганидан кейин, Катта Фарғона каналининг Ўзбекистон тумани Тўлаш маҳалласи ҳудудидан оқиб ўтувчи қисмига бориб, жасадни сувга ташлаб юборган.

 

Мазкур ҳолат юзасидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, А.Т. процессуал тартибда ушланган. Айни вақтда жабрланувчининг жасади топилмаган бўлиб, қидирув ишлари давом этмоқда.

 

Қидирув ишларига Фавқулодда вазиятлар вазирлигининг Фарғона вилояти бошқармаси ходимлари ҳамда маҳаллий аҳоли вакиллари жалб этилган.

 

Эслатиб ўтамиз, аввалроқ Тошкент вилоятининг Бўка туманида ҳам ИИБ ходими билан боғлиқ ҳодисада жабрланувчининг жасади Фарҳод каналидан 80 кундан сўнг топилган эди.