“Ипак йўли цивилизациялар ўртасидаги мулоқотнинг ёрқин намунаси”
ЮНЕСКО бўйича Ўзбекистон Миллий комиссияси раиси Гаяне Умерова Миллий комиссияларнинг 12-йиғилишида маҳаллий ҳамжамиятлар ҳамкорлигини кучайтириш муҳим аҳамият касб этишини таъкидлади.
Самарқанд шаҳрида бўлиб ўтаётган ЮНЕСКО ишлари бўйича Миллий комиссияларнинг 12-йиғилишида маданиятлараро мулоқотни чуқурлаштириш масалалари муҳокама қилинди. Бу ҳақида тадбирда иштирок этаётган “Zamon.uz” мухбири хабар бермоқда.
ЮНЕСКО бўйича Ўзбекистон Миллий комиссияси раиси Гаяне Умерова рақамли даврда, айниқса Ипак йўли бўйлаб маданий меросдан самарали фойдаланиш, барқарор туризмни ривожлантириш ҳамда маҳаллий ҳамжамиятлар ҳамкорлигини кучайтириш муҳим аҳамият касб этишини таъкидлади.
“Ипак йўли цивилизациялар ўртасидаги мулоқотнинг ёрқин намунаси бўлиб, тез суръатларда рақамлашаётган дунёда маданий алмашинув тинчлик, ўзаро англашув ва умумий фаровонликни таъминлашда муҳим ўрин тутади”, — деди Гаяне Умерова.
Унинг қайд этишича, миллий комиссиялар учун бу жараён — маданий меросни таълим, ижод ва замонавий технологиялар билан уйғунлаштирувчи инновацион ёндашувларни илгари суриш имконини беради. Бу орқали жамоалар, айниқса ёшлар ва маҳаллий фаоллар ўз маданий ресурсларининг ҳам сақловчиси, ҳам фойдаланувчиси сифатида фаол иштирок эта олади.
