Истеъфога чиқишини айтган Қодиров яна сайловда қатнашиши мумкин
Чеченистон раҳбари Россия президенти таклифи ва халқ қўллаб-қувватлаши бўлса, сайловларда иштирок этишини билдирди.
Чеченистон раҳбари Рамзан Қодиров Россия президенти томонидан таклиф бўлса ва минтақа аҳолиси томонидан қўллаб-қувватланса, 2026 йилда бўлиб ўтадиган Чеченистон президентлик сайловларида иштирок этишга тайёр эканини билдирди дейди gazeta.ru нашри.
Қайд этилишича, баҳор ойларида Қодиров истеъфога чиқиш ниятини билдирган ва лавозимини тарк этишга умид қилганини айтган эди. Бироқ сиёсий таҳлилчилар унинг яқин орада лавозимни тарк этиш эҳтимолига шубҳа билан қараган.
Кейинчалик Рамзан Қодиров истеъфога чиқиш масаласида якуний қарор қабул қилиш ваколати фақат Россия президенти Владимир Путинга тегишли эканини таъкидлади. У ўзини буйруқларни бажараётган “пиёда аскар” сифатида таърифлаган.
2022 йил сентябрь ойида у лавозимда узоқ вақт ишлаганини ва “номаълум ҳамда узоқ муддатли таътилга” лойиқ эканини билдирган, шунингдек, бу борада тушуниш ва қўллаб-қувватлашга умид қилган.
