Фуқаролик ишлари бўйича Шахрисабз туманлараро судининг 2025 йил 12 сентябрдаги ажримига асосан фуқаро Г.А.нинг даъвоси қаноатлантирилиб, жавобгар М.Б. томонидан ноқонуний ушлаб турилган шахсий мол-мулкларни даъвогарга қайтариб бериш белгиланган.
Мазкур ижро ҳужжати Мажбурий ижро бюросининг Китоб туман бўлими иш юритувига қабул қилиниб, давлат ижрочилари томонидан қонун доирасида тезкор ва қатъий ижро ҳаракатлари ташкил этилди.
Суд ажримига мувофиқ, жавобгарнинг яшаш манзили – Китоб туманида жойлашган хонадонда ижро ҳаракатлари ўтказилди. Ижро жараёнида даъвогарга тегишли бўлган микроволновка, музлатгич, кир ювиш машинаси, телевизор, газ плитаси, идиш-товоқлар, гиламлар, мебел жиҳозлари, заргарлик буюмлари ва бошқа жами 57 турдаги мол-мулклар хатланиб, белгиланган тартибда ундирувчига қайтариб берилди.
Тегишли ташкилотлар ҳамкорлигида амалга оширилган тадбирлар натижасида низоли ҳолат тинч йўл билан ҳал этилди.