Марказий Осиё давлатлари раҳбарларининг еттинчи Маслаҳат учрашуви якунида минтақавий бирдамлик ва ҳамкорликни кучайтиришга қаратилган Қўшма баёнот қабул қилинди. Учрашувда минтақанинг долзарб муаммолари юзасидан конструктив мулоқот олиб борилди.
Саммитнинг энг муҳим натижаларидан бири — Озарбайжон Республикасининг форматга тўла ҳуқуқли аъзо сифатида қўшилгани бўлди. Бу қарор Марказий Осиё ва Жанубий Кавказ ўртасидаги стратегик яқинликни мустаҳкамлаши, янги иқтисодий ва логистика имкониятларини очиб бериши таъкидланди.
Йиғилишда, шунингдек, Қирғиз Республикасининг 2027–2028 йилларда БМТ Хавфсизлик Кенгашининг муваққат аъзолигига номзоди қўллаб-қувватланиши юзасидан халқаро ҳамжамиятга мурожаат йўлланди. Минтақада хавфсизлик ва барқарорликни таъминлашга қаратилган концепция ҳамда таҳдидлар каталоги тасдиқланди.
Давлат раҳбарлари 2026–2028 йилларда хавфларнинг олдини олишга доир аниқ чоралар режаси устида келишиб олдилар. Саммит иштирокчилари ушбу ҳужжатлар Марказий Осиёда тинчлик, тараққиёт ва дўстона алоқаларнинг мустаҳкамланишига хизмат қилишига ишонч билдирдилар.