2026 йил 6 февраль куни Ўзбекистон ҳукумати вакиллари Қорақалпоғистон Республикасига ташрифи доирасида ҳудуддаги тадбиркорлар билан учрашув ўтказди. Мулоқот давомида тадбиркорлик субъектлари томонидан кўтарилган долзарб масалалар, жумладан, ёқилғи қуйиш шохобчалари қурилиши билан боғлиқ масалалар муҳокама қилинди.
Учрашувда Амударё туманида фаолият юритувчи тадбиркор автомобиллар учун электр, газ ва бензин заправкалари қуришни режалаштираётганини, ушбу мақсадда 40 сотих ер майдони ажратилгани ҳамда қурилиш учун зарур жиҳозлар тайёр экани маълум қилди. Шу билан бирга, метан заправка қуриш учун Энергетика вазирлигидан рухсат олиш жараёнида муаммолар мавжудлиги айтилиб, ушбу масалада кўмак сўради.
Бош вазир ўринбосари Жамшид Хўжаев масалага изоҳ берар экан, ҳозирги вақтда мавжуд метан заправкаларини ҳам газ билан таъминлашда қийинчиликлар кузатилаётганини таъкидлади. Шу сабабли янги метан заправкалар қурилишига рухсат берилмаётганини таъкидлади.
Қорақалпоғистон Республикаси Вазирлар Кенгаши раиси Фарҳод Эрмановнинг маълум қилишича, метан заправкалар қурилишига чеклов жорий этилгани ҳақида тадбиркорлар олдиндан огоҳлантирилган. Унга кўра, ушбу чеклов ўтган йилдан бошлаб амал қилмоқда ва ҳозирда янги метан заправкалар қурилиши учун рухсат берилмайди.