Украиналик дипломат Арманистондаги кўлда чўкиб кетди
Sputnik Armaniston Севан кўлига чўкиб кетган шахс Украинанинг Арманистондаги муваққат ишлар вакили Александр Сенченко эканини маълум қилди.
13 август куни Украина дипломати Арманистондаги Севан кўлида чўкиб кетди. Бу ҳақда жиноят хроникаларига ихтисослашган shamshyan.com арман онлайн ресурси хабар берди.
Арманистон полицияси ушбу воқеа ҳақида чўкиб кетган шахснинг исми ва фуқаролигини кўрсатмасдан хабар берган.
Shamshyan.com сайтига кўра, “сувда чўкиб ҳалок бўлган шахс Украинанинг Арманистондаги элчисининг маслаҳатчиси С.О." бўлган.
Қолаверса, Sputnik Armaniston ҳам ўз манбаларига таяниб, Севан кўлига чўкиб кетган шахс Украинанинг Арманистондаги муваққат ишлар вакили Александр Сенченко эканлигини маълум қилди.
Александр Сенченконинг ўлимини Украина Ташқи ишлар вазирлиги ҳам тасдиқлаган.
“Украина Ташқи ишлар вазирлиги ушбу йўқотиш муносабати билан марҳумнинг оила аъзолари ва яқинларига чуқур ҳамдардлик билдиради”, — дейилади хабарда.
