Олий маълумотли одамлар секинроқ қариши аниқланди

Лондон университет коллежи олимлари ўтказган тадқиқот натижаларига кўра, юқори ижтимоий-иқтисодий мақомга эга бўлган одамлар, жумладан, олий маълумотли ва юқори даромадли шахслар, тенгдошларига нисбатан секинроқ қарийди ва ёшга боғлиқ касалликларга камроқ дучор бўлади.

 

Тадқиқот доирасида 800 000 дан ортиқ иштирокчи қатнашган тўртта йирик лойиҳа натижалари таҳлил қилинди. Қариш жараёни ёшга боғлиқ касалликлар ва қон плазмасидаги оқсиллар таркиби орқали баҳоланди.

 

Асосий натижалар: Паст ижтимоий мақомга эга бўлган одамлар юқори мақомдагиларга нисбатан 20 фоиз кўпроқ ёш билан боғлиқ касалликларга чалинади. Улар 20 йил ўтгач юқори мақомдаги гуруҳ билан бир хил миқдорда қариш билан боғлиқ ташхисларга эга бўлган – яъни тезроқ қариш кузатилган. Кам таъминланган одамларда 2-тоифа диабет, юрак-қон томир касалликлари, жигар касалликлари, ўпка саратони ва инсульт хавфи икки баравар юқори. Қондаги 14 та оқсил даражаси бевосита инсоннинг ижтимоий мавқейига боғлиқ бўлиб, юқори ижтимоий мавқе касаллик хавфини 39 фоизгача камайтириши мумкин.

 

Шунингдек, тадқиқотчилар ёшга қараб ижтимоий мавқени яхшилаш қариш жараёнини ижобий йўналишда ўзгартириши мумкинлигини аниқладилар. Болалигида қийин шароитда яшаган, лекин кейинчалик юқори даромад ва мақомга эришган одамларда ёшга боғлиқ касалликлар камроқ учрайди.

 

Профессор Линда Партридге бу жараён турмуш тарзи, стресс даражаси, руҳий саломатлик, атроф-муҳит ифлосланиши, озиқланиш, жисмоний фаоллик, чекиш ва спиртли ичимликларни истеъмол қилиш билан боғлиқ бўлиши мумкинлигини таъкидлади. Шунингдек, тиббий хизматлардан фойдаланиш имконияти, жумладан, профилактик текширувлар ва эмлашлар, саломатлик ҳолатига таъсир қилувчи муҳим омиллардан бири ҳисобланади.