БМТ билан 166 та қўшма лойиҳа: Саида Мирзиёева БМТ Бош котиби билан учрашди
Учрашувда соғлиқни сақлаш, таълим, камбағалликни қисқартириш ва экологик барқарорлик каби йўналишлардаги ҳамкорликка эътибор қаратилди.
Президент Администрацияси раҳбари Саида Мирзиёева Нью-Йорк шаҳрида БМТ Бош котиби Антониу Гутерриш билан учрашув ўтказди.
Мулоқот давомида Ўзбекистон ва Бирлашган Миллатлар Ташкилоти ўртасидаги ҳамкорликни янада ривожлантириш, шунингдек, ўзаро алоқаларнинг устувор йўналишлари муҳокама қилинди.
Саида Мирзиёева халқаро муносабатлар тизимида мураккаб жараёнлар кечаётган ҳозирги даврда глобал миқёсда етакчилик салоҳиятини намоён этаётгани ҳамда хавфсизликнинг асосий йўналишларида Ўзбекистонни қўллаб-қувватлаётгани учун Антониу Гутерришга миннатдорлик билдирди.
Таъкидланганидек, бугунги кунда Ўзбекистон ва БМТ институтлари ўртасидаги ҳамкорлик амалий лойиҳалар орқали изчил ривожланмоқда. Ҳозирда ташкилот тузилмалари иштирокида мамлакатимизда умумий қиймати 293 миллион долларлик 166 та қўшма лойиҳа амалга оширилмоқда.
Мазкур лойиҳалар соғлиқни сақлаш, сифатли таълимни ривожлантириш, камбағалликни қисқартириш ва экологик барқарорликни таъминлаш каби муҳим йўналишларни қамраб олган.
Саида Мирзиёеванинг Антониу Гутерриш билан учрашуви Ўзбекистоннинг БМТ доирасидаги ҳамкорликни мустаҳкамлаш ҳамда замонавий глобал муаммоларга амалий ечимлар ишлаб чиқишда фаол иштирок этишга интилаётганини намоён этди.
