Ўзбекистонда “LADA Vesta CW” ва “LADA XRAY” русумли автомобиллар ишлаб чиқарила бошланди
Жиззахда “LADA” автомобилларини ишлаб чиқариш бошланди. Бу ҳақда “Spot” нашри хабар берди.
Унда айтилишича, автомобиллар “ADM Jizzakh” автомобиль заводида ишлаб чиқарилмоқда.
SKD усулида ишлаб чиқарилган биринчи “LADA Vesta CW” ва “LADA XRAY” моделлари дилерларга юбориш учун тахт қилиб қўйилган. Яқин келажакда улар қаторига “LADA Largus” ҳам қўшилиши режалаштирилмоқда.
“Ўзбекистон “Автоваз” учун асосий экспорт бозорларидан бири бўлиб, “LADA” бренди республикада яхши танилган. Бу эса “LADA”нинг мамлакат бозорида ўз ўрнига эга бўлишига имкон беради” , — дейди компания расмий вакили.
Маълумотларга қараганда, 2020 йил давомида Ўзбекистонда “Roodell” дилерлик тармоғи орқали 5 мингдан ортиқ “LADA” автомобиллари сотилган.
Унинг энди маҳаллий заводларда йиғилиб, бозорга чиқарилиши бошқа турдаги автомобиллар билан рақобатга киришига имкон яратади. Бу эса, биринчи навбатда, кредит дастурлари ва “Trade-in” ёрдамида автомобиллар нархи янада арзонлашишига сабаб бўлади. Шунингдек, “LADA” брендининг Ўзбекистон автомобиль бозоридаги ўрнини янада кенгайтиради, нуфузини оширади.
Эслатиб ўтамиз, Ўзбекистонда “Nexia-3” ва “Spark” автомобилларини ишлаб чиқариш камайгани ҳамда “Chevrolet Tracker”нинг илк партияси ҳали ишлаб чиқарилмасдан сотиб бўлингани хабар қилинганди.
Оламгир Абдиев
