Ўзбекистонда ОИВ билан яшаётганлар сони 52 мингдан ошди

 

Ўзбекистонда ОИВ инфекцияси бўйича янгиланган статистика эълон қилинди. Расмий маълумотларга кўра, мамлакатда 52 мингдан ортиқ фуқаро иммунитет танқислиги вируси билан яшамоқда. Уларнинг қарийб 46 минг нафари антиретровирус терапияси (АРТ) билан қамраб олинган бўлиб, беморларнинг 88 фоизида вирус юки аниқланмайдиган даражагача пасайган.

 

Мазкур кўрсаткичлар 1 декабрь – Жаҳон ОИТСга қарши кураш кунига бағишлаб ташкил этилган матбуот анжуманида тақдим қилинди.

 

2025 йилда ОИВ бўйича профилактик тадбирлар кенгайтирилди ва 5 миллиондан зиёд аҳоли скрининг текширувларидан ўтказилди. Узоқ ҳудудларни қамраб олиш мақсадида мобил тиббий бригадалар фаолияти йўлга қўйилди. Натижада, ОИВ билан яшаётган аҳолининг 95 фоизи ўз соғлиғи ҳолатини текшириш ва зарурат туғилганда даволанишни бошлаш имконига эга бўлди.

 

Шунингдек, мамлакатда барча ҳомиладор аёллар ОИВ инфекциясига текширувдан ўтказилмоқда. Касаллик аниқланган оналардан туғилган 700 дан ортиқ чақалоқ илк олти ой мобайнида махсус хавфсиз озуқа формулалари билан таъминланмоқда.

 

Жорий йилда антиретровирус дори воситаларини харид қилиш учун давлат бюджети ҳамда Глобал жамғарма маблағлари ҳисобидан деярли 7 миллион доллар йўналтирилган.

 

Соғлиқни сақлаш вазирлиги маълумотига кўра, 2027 йилгача ОИВ скринингини янада кенгайтириш, тезкор тестлар ва ўз-ўзини текшириш тизимини жорий этиш, профилактика хизматлари ҳамда статистик жараёнларни тўлиқ рақамлаштириш режалаштирилган.