Покистонда савдо марказидаги ёнғинда ҳалок бўлганлар сони 60 нафарга етди
Ҳалок бўлганларнинг шахси суд-тиббий экспертиза орқали аниқланмоқда.
Покистоннинг Карачи шаҳрида жойлашган йирик савдо марказида содир бўлган ёнғин оқибатида ҳалок бўлганлар сони 60 нафарга етди. Қутқарув хизматлари воқеа жойида қидирув-қутқарув ишларини давом эттирмоқда.
Маълумотларга кўра, ёнғин 17 январ куни савдо марказида келиб чиққан. Анадолу ажанси нашрининг хабар беришича, қутқарувчилар вайроналар остидан яна 30 нафар қурбоннинг жасадини топган. Ҳалок бўлганларнинг шахси суд-тиббий экспертиза орқали аниқланмоқда.
Ёнғиндан сўнг ўнлаб одамлар бедарак йўқолгани ҳақида ҳам хабарлар мавжуд бўлиб, қидирув ишлари шу йўналишда давом эттирилмоқда.
Ёнғин содир бўлган савдо мажмуаси тахминан 8 минг квадрат метр майдонни эгаллаган бўлиб, унда қарийб 1200 та дўкон жойлашган. Ҳодиса оқибатида бинонинг бир қисми қулаб тушган.
Ҳозирча ёнғиннинг келиб чиқиш сабаблари аниқланмаган. Ваколатли идоралар томонидан ҳолат юзасидан текширув ишлари олиб борилмоқда.
