Барча шароитларга эга, кенг, ёруғ ва шинам хоналарда дарс ўтишнинг гашти ўзгача. Айниқса, ўқувчилар талабчан бўлса. Ушбу мактабларга педагоглар қандай қабул қилинади? Ўқитувчининг иш стажи қанчалик муҳим? Қандай ҳужжатлар зарур? Журналистларни қизиқтирган бу каби саволларга Президент, ижод ва ихтисослаштирилган мактабларни ривожлантириш агентлиги томонидан ўтказилган матбуот анжуманида мутахассислар томонидан жавоб қайтарилди.
Қайд этилганидек, Агентлик тизимидаги мактабларга ишга кириш истагида бўлган педагоглар учун «job.piima.uz» сайти ташкил этилган.
— Сайтга Ўзбекистоннинг барча ҳудудларида фаолият юритаётган педагоглардан аризалар келиб тушган ва ишга кириш истагида бўлган номзодлар уч босқичли синовдан ўтказилди, — дейди Агентлик матбуот хизмати раҳбари Дилфуза Собирова. — Талабгорлар биринчи босқичда веб-сайтда ариза бериш ва ҳужжатларни тақдим этишди. Иккинчи босқичда эса ўз фани доирасида тест топширишди. Мазкур тест синовлари Таълим сифатини назорат қилиш давлат инспекцияси билан ҳамкорликда ташкил этилди. Жараённинг шаффолигини таъминлаш мақсадида онлайн шаклда ташкил этилди. Учинчи босқичда номзодлар билан ZOOM платформаси орқали суҳбат олиб борилди. Унда STEM фанларидан дарс берадиган ўқитувчилар билан инглиз тилида суҳбат ўтказилди. Президент, ижод ва ихтисослаштирилган мактаб педагогларига қўйиладиган биринчи талаб ҳам айнан, инглиз тилини билиш. Веб-сайтга жами 1 517 та ариза келиб тушган эди. Уларнинг 585 нафари саралаш босқичида иштирок этди.
Тадбирда ушбу мактабларга ишга кириш истагида бўлган чет эллик ўқитувчилар ҳам ариза топширгани қайд этилди. Уларни саралаб олишда ҳам бир қатор талаблар мавжуд бўлиб, талабгорлар Cambridge Curriculumда ишлай олиши, педагог ёндашуви ҳамда истеъдодли болалар билан ишлаш амалиёти ҳисобга олинади.
Эслатиб ўтамиз, Президент, ижод ва ихтисослаштирилган мактабларга қабул қилинган ўқитувчилар рўйхати август ойининг биринчи ҳафтасида эълон қилинади.
Баҳринисо МАДУМАРОВА