Қашқадарёда 200 нафардан ортиқ фуқаронинг уй-жойларига эгалик ҳуқуқлари берилди
Шунингдек, вилоятдаги 24 мингдан ортиқ фуқаролар ва юридик шахсларга кадастр ҳужжатлари топширилди.
Қашқадарё вилоятида ер муносабатлари ва кўчмас мулк объектларига оид ҳуқуқий тартиботларни мустаҳкамлаш борасида кенг кўламли ишлар амалга оширилмоқда.
Кадастр агентлиги вилоят бошқармаси ва унинг ҳудудий бўлимлари томонидан ўтказилган мониторинг натижасида 1494 та ҳолатда жами 277,7 гектар ер участкаларида қонунбузарликлар аниқланди. Ушбу ҳолатлар юзасидан ўзбошимчалик билан ер эгаллаган шахсларга ёзма кўрсатмалар юборилиб, 709 та қонунбузарлик жойида бартараф этилди.
Шунингдек, 43,4 гектар ер майдонидаги ноқонуний қурилишларни олиб ташлаш ва ерни тиклаш бўйича судларга 660 та даъво аризаси киритилди.
Вилоятдаги 24 446 нафар фуқаролар ва юридик шахсларга тегишли ер ва кўчмас мулк объектларига кадастр паспортлари тайёрланиб, давлат хизматлари марказлари орқали тақдим этилди. Бундан ташқари, биринчи ярим йилликда 180,9 гектарни ташкил этувчи 1675 та бўш ер участкалари аниқланиб, “YERELEKTRON” тизимига киритилди. Шундан 1935 та участка 141 гектардан зиёд ҳудудни қамраб олган ҳолда аукцион савдоларига чиқарилди.
937-сонли Қонун ижросини таъминлаш доирасида вилоятда 200 нафар кадастр ходими хатлов ишларига жалб этилди. Шу вақтга қадар 36 мингга яқин кўчмас мулк объектлари хатловдан ўтказилди. Натижада, Халқ депутатлари вилоят Кенгашининг қарорлари билан 202 нафар фуқарога уй-жойлар устидан мулк ва ижара ҳуқуқлари расман эътироф этилди.
Бу ишлар аҳолининг ер ва уй-жойга бўлган ҳуқуқларини мустаҳкамлаш, мулк ҳуқуқларини қонунийлаштириш ва эркин иқтисодий муҳитни шакллантиришга хизмат қилмоқда.
