Қашқадарёда газ баллонлари ўгирланди
Деҳқонобод туманида суюлтирилган газ таъминотидаги қонунбузилиш ҳолатлари бўйича ўрганиш ўтказилган.
“Ҳудудгаз Қашқадарё” газ таъминоти филиали комплаенс назорат тузилмалари, ҳуқуқ-тартибот органлари ходимлари билан ҳамкорликда Қашқадарё вилоятининг Деҳқонобод туманида суюлтирилган газ таъминотидаги қонунбузилиш ҳолатларини аниқлаш бўйича ўрганиш ўтказилди.
Жорий йилнинг 12 декабрь куни туман суюлтирилган газ хизмати таъминотчи-чилангари ҳамда махсус автотранспорт воситаси ҳайдовчиси "Тоғайтемир" МФЙ истеъмолчиларига етказиб берилиши лозим бўлган 100 дона маиший газ баллонларни мазкур маҳаллада истиқомат қилувчи фуқаронинг хонадонида ташкил этилган "бункер"га тушираётгани аниқланган. Хонадон кўздан кечирилганда олиб келинган баллонлардан ташқари яна 101 та бўш маиший газ баллонлар борлиги маълум бўлган.
Айни вақтда ҳолат юзасидан далолатнома тузилиб, барча ҳужжатлар ҳуқуқни муҳофаза қилувчи органлар ва ФВБга тақдим этилган.
