Қашқадарёда юк машинаси дарёга тушиб кетди
Ҳодиса оқибатида 2 нафар Тожикистон фуқароси қисилиб қолган.
Кеча, 5 август куни Қашқадарё вилоятининг Ғузор туманида юк машинаси дарёга тушиб кетди. Бу ҳақда вилоят ФВБ хабар берди.
Ҳодиса соат 17:40 ларда Ғузор тумани Термиз–Тошкент автомобиль йўлининг 1249-километрида содир бўлган. ДАФ русумли юк машинаси ҳайдовчиси бошқарувни йўқотиб, Ғузор дарёсига тушиб кетган. Оқибатда 2 нафар Тожикистон фуқаролари турли даражадаги тан жароҳати олиб, юк машинасида қисилиб қолишган.
Ғузор туман ФВБ дан қутқарув экипажи воқеа жойига соат 17:55 ларда етиб борган, ёнғин-қутқарувчиларининг саъй-ҳаракатлари ва маҳаллий фуқароларнинг кўмагида 2 нафар фуқаро қутқариб олиниб, туман тиббиёт бирлашмасига юборилди. Ҳозирда фуқаролар шифокорлар назоратида.
Ҳозирда ҳолат бўйича суриштирув ишлари олиб борилмоқда.
