Қўпол қонунбузарлик: Зангиотада корхона пластикларни қайта ишлаш ўрнига ёқиб юбораётгани аниқланди
Корхона атмосферага инсон саломатлиги учун ўта хавфли бўлган кансероген моддалар ва заҳарли тутун тарқатиб келган.
Экорейдлар натижасида чиқинди ёқаётган корхоналар аниқланмоқда.
Навбатдаги экологик рейд давомида пластик ва целлофан маҳсулотларини қайта ишлашга ихтисослашган корхонада қўпол қонунбузарлик ҳолати аниқланди.
Текширув чоғида Зангиота туманидаги ушбу обектда чиқиндиларни белгиланган тартибда қайта ишлаш ўрнига, улар тўғридан тўғри ёқиб юборилаётгани маълум бўлди. Шунингдек, ушбу корхона ҳудудидаги темирчилик устахонасида ҳам турли чиқиндилар мунтазам ёқиб келинган. Оқибатда атмосферага инсон саломатлиги учун ўта хавфли бўлган кансероген моддалар ва заҳарли тутун тарқалиб келган.
Ҳозирда ушбу ҳолат юзасидан тегишли ҳужжатлар расмийлаштирилиб, айбдорларга нисбатан қонуний чора кўрилмоқда.
Давлат аҳоли соғлиғи ва хавфсизлигини устувор деб билмоқда. Ҳавони ифлослантирувчи ва маълум бир гуруҳга фойда келтирувчи ҳеч бир обект жамият манфаатларидан устун бўла олмайди.
