Қозоғистон қўшни давлатларни сунъий йўлдош интернети орқали улаш режасини эълон қилди. Мамлакат ичида жойлаштирилган Starlink сунъий йўлдош инфратузилмасидан фойдаланиб, минтақавий интернет уланишини кенгайтириш кўзда тутилмоқда. Бу ҳақда Vlast.kz нашри хабар берди.
Сунъий интеллект ва рақамли ривожланиш вазири Жаслан Мадиевнинг маълум қилишича, 2026 йил давомида интернет-трафикни Тожикистонга узатиш режалаштирилган. Кейинги босқичда ушбу имконият Мўғулистон ва Қирғизистонга ҳам тақдим этилиши мумкин.
Қайд этилишича, Starlink тизими Қозоғистон ҳудудида қурилган шлюз станциялари орқали қўшни давлатлар учун интернетга уланиш имконини яратади. Бу эса мамлакатнинг минтақавий рақамли марказ сифатидаги ролини кучайтириши кутилмоқда.
Шу билан бирга, мамлакат ички рақамли инфратузилмасини кенгайтириш ишлари ҳам давом этмоқда. Жорий йил якунига қадар 1900 та қишлоқ оптик толали интернет билан таъминланади. Келгуси йилда бу кўрсаткич қишлоқ ҳудудларининг 90 фоизидан ошиши режалаштирилган.
Бундан ташқари, барча миллий автомобиль йўллари оптик толали алоқа билан қамраб олинади. Интернет хизматлари темир йўл йўловчи йўналишлари ҳамда маҳаллий авиакомпаниялар рейсларида ҳам босқичма-босқич жорий этилади.
Расмий маълумотларга кўра, 2027 йилга бориб 20 та йирик шаҳарда 5G тармоғи қамрови 60–75 фоизгача етказилади. Шу даврга келиб, мамлакат бўйлаб интернет қамрови 100 фоизга яқинлашиши, тезлик эса сониясига 100 мегабитдан ошиши режалаштирилган.