Россияда ҳужумни давом эттириш учун етарли захира йўқлиги айтилмоқда
Украина можароси давомида РФ 16 та танк полкидан айрилган бўлиши мумкин.
Россияда Луганск вилоятида бошланган ҳужумни ривожлантириш ва сезиларли муваффақиятларга эришиш учун етарли захиралар йўқ. Бу ҳақда Америка урушни ўрганиш институти (ISW) экспертлари маълум қилди.
Ғарбий ҳарбий округ бўлинмалари таркибини ўрганган таҳлилчилар уларнинг айримларида танк қисмлари йўқлигига эътибор қаратган. Бу Россияда йўқотилган бронетехника ўрнини тўлдиришда қийинчиликлар борлигини кўрсатади.
“Россия кучларида катта эҳтимол билан захирада бир қанча қайта тикланган механизация қисмлари бор, аммо ушбу чекланган резервларни Луганскдаги фронтга юбориш ҳужум темпини ўзгартира олмайди”, – дейилади ҳисоботда.
Экспертларнинг фикрича, бу резервларни жангга киритиш чекланган ўзгаришларга олиб келади, аммо белгиланган стратегик мақсадларга эришиш учун етарли эмас.
ISW тахминига кўра, РФ Украина можароси давомида 16 та танк полкини йўқотган. Ҳозирда зирҳли техникани таъмирлаш ва янгиларини ишлаб чиқаришга қувватлар етишмаяпти. Бу ўз навбатида Россия қуруқлик қўшинларини зарбдор кучлардан маҳрум этмоқда.
