Бангладешда қизамиқ эпидемияси: мингдан ортиқ бола вафот этди

Бангладешда март ойидан буён давом этаётган қизамиқ эпидемияси оқибатида мингдан ортиқ бола вафот этгани хабар қилинди. Мамлакатда фавқулодда эмлаш кампанияси ўтказилаётганига қарамай, касалланиш ҳолатлари яна ортмоқда, дея хабар бермоқда BBC.

 

Ҳукуматнинг сўнгги маълумотларига кўра, март ойидан буён қизамиқ билан боғлиқ 194 мингдан ортиқ ҳолат қайд этилган. Сешанба куни қизамиқдан гумон қилинган яна саккиз киши вафот этган.

 

Мамлакатда 19,8 миллиондан ортиқ бола фавқулодда эмлаш кампанияси доирасида вакцина олган. UNICEF маълумотига кўра, 26 сентябрдан эмланмаган болаларни аниқлаш ва уларни қамраб олиш учун кампаниянинг кучайтирилган босқичи бошланади.

 

Жаҳон соғлиқни сақлаш ташкилоти (ЖССТ) маълумотларига кўра, Бангладеш 2026 йилда дунёнинг бошқа мамлакатларига қараганда қизамиқ билан боғлиқ кўпроқ ҳолат қайд этган. 

 

Ташкилот маълумотида тасдиқланган қизамиқ ҳолатларининг қарийб 83 фоизи эмланмаган болалар ҳиссасига тўғри келиши қайд этилган. Ҳолатларнинг 10 фоизи эса 6 ойликдан кичик чақалоқларда аниқланган. Бу ёшдаги болалар эпидемия вақтида касалликнинг оғир кечиши хавфи юқори бўлган гуруҳ ҳисобланади.

 

ЖССТга кўра, эпидемия эмлаш кампанияси бошланишидан олдин мамлакат бўйлаб кенг тарқалган. Шу сабабли юзага келган юқиш занжирларини тўлиқ тўхтатиш учун вақт талаб этилмоқда. Ташкилот айрим мақсадли болалар эмлаш тадбирлари билан қамраб олинмаганини ҳам тан олган.

 

UNICEF дастлабки эпидемиянинг кучайишига бир нечта омил, жумладан, аҳоли зичлиги ва COVID-19 пандемияси сабаб мунтазам эмлашларнинг кечиктирилишини сабаб сифатида кўрсатган.

 

БМТ ташкилоти, шунингдек, Бангладешнинг Муҳаммад Юнус бошчилигидаги муваққат ҳукумати ўтган йили вакциналар буюртмасини кечиктиргани ва бунинг оқибатида вакцина таъминотида узилишлар юзага келганини билдирган. Муҳаммад Юнус ҳукуматида соғлиқни сақлаш соҳасида юқори лавозимда ишлаган собиқ амалдор эса вакцина танқислиги бўлганини рад этган.

 

Жамоат саломатлиги бўйича эксперт доктор Муштуқ Ҳусайннинг фикрича, дастлабки фавқулодда эмлаш кампанияси етарли даражада кенг қамровли бўлмаган. У кампания кўпроқ ҳудуд ва ёш гуруҳларини қамраб олиши, шунингдек, тиббиёт ходимлари уйма-уй юриб, аҳолига касаллик хавфи ҳақида тушунтириш ишларини олиб бориши кераклигини таъкидлаган.

 

Эпидемия мамлакатдаги шифохоналарга ҳам катта босим туширган. BBC июнь ойида ташриф буюрган айрим шифохоналарда ўнлаб оилалар полга тўшалган кўрпаларда ётганини қайд этган. Бир шифохона эса одатдаги қувватидан икки баравар кўпроқ юклама билан ишлаган.

 

Июнь ойидаги маълумотлар билан таққослаганда, ўшандан буён яна 300 нафар бола вафот этган.

 

Қизамиқ нафас олиш, йўталиш ва аксириш орқали осон юқадиган ўта юқумли касаллик ҳисобланади. Тўйиб овқатланмаслик эса касалликнинг оғир асоратлари ва ўлим хавфини ошириши мумкин.

 

Бангладеш қизамиқ эпидемияси кузатилаётган ягона мамлакат эмас. Буюк Британия илгари қизамиқни йўқ қилган мамлакат мақомига эга бўлган, бироқ жорий йилда бу мақомини йўқотган. АҚШда ҳам сўнгги йилларда қизамиқ билан касалланиш ҳолатлари ошган.

 

ЖССТ қизамиқ тарқалишининг олдини олиш ва жамоавий иммунитетни таъминлаш учун аҳолининг камида 95 фоизини эмлаш зарурлигини таъкидлайди.