27 ноябрь куни Ўзбекистонга янги тайинланган бир қатор давлатларнинг фавқулодда ва мухтор элчилари ишонч ёрлиқларини топширди. Бу ҳақда Президент матбуот хизмати хабар берди.
Маросимда Президент Шавкат Мирзиёев Грециядан Параскеви Тсевелеки, Индонезиядан Сити Руҳайни Дзҳуҳаятин, Латвия элчиси Гиртс Яунзем, Франциядан Валид Фук, Россиядан Алексей Эркҳов, Япониядан Кендзи Ҳирата ва Тожикистондан Насриддин Исматулло топширган ишонч ёрлиқларини қабул қилди.
Давлат раҳбари элчиларни самимий табриклаб, ҳозирги беқарор глобал шароитда дипломатлар фаолияти янада муҳим аҳамият касб этаётганини қайд этди.
Унинг сўзларига кўра, элчилар юртимизда бўлган қисқа вақт давомида Ўзбекистоннинг жадал ривожланиш суръатлари ва мамлакатнинг халқаро дипломатиядаги нуфузи тобора ошиб бораётганига ўз кўзлари билан гувоҳ бўлмоқда.
Шунингдек, сўнгги йилларда Ўзбекистонда нуфузли халқаро тадбирлар — Тошкент халқаро инвестиция форуми, Парламентлараро иттифоқнинг 150-юбилей ассамблеяси, “Марказий Осиё — Европа Иттифоқи” биринчи саммити, Халқаро иқлим форуми ва ЮНEСКО Бош конференциясининг тарихий сессияси муваффақиятли ўтказилгани таъкидлаб ўтилди.
Ўзбекистон ташаббуси билан БМТ Бош Ассамблеяси томонидан сўнгги йилларда 13 та резолюция қабул қилингани ҳам алоҳида эслатилди.
Президент мамлакатнинг Глобал барқарор ривожланиш мақсадлари индексида 19 поғона юқорилагани, сўнгги саккиз йилда иқтисодиёт икки баравардан кўпроққа ошгани ва камбағаллик даражаси 35 фоиздан 6,6 фоизга камайгани ҳақида маълумот берди.
Шавкат Мирзиёев, шунингдек, элчилар вакиллик қилаётган давлатларнинг Ўзбекистоннинг Жаҳон савдо ташкилотига аъзо бўлиш жараёнини қўллаб-қувватлаётганидан миннатдорлик билдирди.
Маросим якунида давлат раҳбари янги элчиларга фаолиятларида катта муваффақиятлар тилаб, икки томонлама ҳамкорликни мустаҳкамлаш учун мавжуд барча имкониятлардан самарали фойдаланишга чақирди. Шу билан бирга, ҳудудлар ва хусусий сектор билан фаол ишлашни тавсия этди.
Хорижий дипломатлар эса илиқ қабул ва яратилган қулай шарт-шароитлар учун миннатдорлик билдириб, Ўзбекистон билан кўп қиррали ҳамкорликни ривожлантиришга тайёр эканини таъкидлади.