Сирдарёда уч йил алимент тўламай юрган ота молхонадан топилди
63 миллион сўм алимент қарзини тўламаган эркак қўлга олинди.
Сирдарё вилоятида алимент тўлашдан қочиб, уч йил давомида қидирувда бўлган эркак аниқланиб, ҳуқуқни муҳофаза қилувчи органлар томонидан қўлга олинди.
Тергов маълумотларига кўра, мазкур фуқаро икки нафар фарзандига суд қарорига биноан тўланиши лозим бўлган алимент маблағларини мунтазам равишда тўламай келган. Унинг жами қарздорлик суммаси 63 миллион сўмни ташкил этган.
Изланиш натижасида қочқин отанинг Навоий вилояти, Ҳатирчи туманида жойлашган бир фермадаги молхонада яшириниб юргани аниқланган. Уни топиш бўйича тезкор чоралар кўрилган ва эркак ҳибсга олинган.
Маъмурий суд қарорига мувофиқ, у алимент қарзини тўлашдан қасддан бўйин товлагани учун 15 суткага маъмурий қамоқ жазосига ҳукм қилинди. Шу билан бирга, унинг қолган қарздорлигини ундириб олиш бўйича ҳуқуқий тартибда ишлар олиб борилмоқда.
