Сурия валютасидан Асаднинг портрети олиб ташланади
Янги Сурия фунти олтита номиналда, тасвир ва портретларсиз чиқарилади.
Сурия миллий валютасидан мамлакат собиқ президенти Башар ал-Асаднинг портрети олиб ташланади. Бу ҳақда Сурия Марказий банки раҳбари Абдулқодир ал-Ҳасрия расмий баёнот берди.
Маълум қилинишича, янгиланган Сурия фунти 2026 йил 1 январдан бошлаб муомалага киритилади. Марказий банк раҳбарининг таъкидлашича, мазкур қарор мамлакатда янги иқтисодий босқич бошланаётганини, шунингдек, қўлга киритилган сиёсий суверенитет ва миллий бирлик тамойилларига содиқликни акс эттиради.
Ҳозирги вақтда Сурияда муомалада бўлган қоғоз банкноталарда эски сиёсий рамзлар сақланиб қолган. Хусусан, 2000 фунтлик банкнотада Башар ал-Асаднинг, 1000 фунтлик купюрада эса унинг отаси — Сурия собиқ президенти Ҳофиз ал-Асаднинг портрети тасвирланган.
Янгиланиш доирасида Сурия фунти олтита номиналда чиқарилиши режалаштирилган бўлиб, банкноталарда шахсий портретлар, сиёсий рамзлар ёки тасвирлар жойлаштирилмайди. Бу ёндашув валютани сиёсий образлардан холи қилишга қаратилган.
Шунингдек, Сурия фунтининг сўнгги йилларда кескин қадрсизлангани сабабли уни қайта номлаш жараёни ҳам амалга оширилиши кўзда тутилган.
