“TikTok” ижтимоий тармоғида пичоқ кўтариб видеога тушган тасвирни тарқатган мактаб ўқувчиси жаримага тортилди

 

“TikTok” ижтимоий тармоғида мактаб кийимидаги вояга етмаган бола турар-жой яқинида пичоқ кўтариб юргани  тасвирланган видео тарқалди.  

 

Видеодаги 17 ёшли  ўсмир З.Н. Олмазор туманидаги умумтаълим мактаби битирувчиси экани аниқланди. У таълим оладиган  мактаб  маъмурияти ҳам юқоридаги постга эътибор қаратган.

 

Ўсмирнинг отаси Тожикистон Республикасида туғилган  44 ёшли А.Н. суҳбатга чақирилганда вақти йўқлигини рўкач қилиб, мактабга қариндошини жўнатган.

 

Бу ҳолат бўйича Тошкент шаҳар ИИББ ходимлари томонидан Маъмурий жавобгарлик тўғрисидаги кодексининг 47-моддаси 1-қисми бўйича баённома расмийлаштирилди. Фуқаро БҲМнинг 2 баравари миқдорида жаримага тортилди. Шунингдек, ҳолат тўғрисида маълумот Олмазор тумани вояга етмаганлар масалалари бўйича идоралараро комиссияга жўнатилди.

 

Мактаб маъмурияти томонидан Олмазор тумани ИИО ФМБ инспектор-психологи иштирокида ўсмир ва унинг яқинлари билан профилактик суҳбат ўтказилди ҳамда  мактаб ўқувчилари ва ўқитувчилари билан мактаб биносига пичоқ ва бошқа хавфли буюмларни олиб келиш мумкин эмаслиги тўғрисида суҳбат ўтказилди.

 

Эслатиб ўтамиз, бундан аввал Қашқадарёда йигит ва қизнинг ЙПҲ ходими формасини кийиб, “TikTok” платформасига жойлаштирганлар жаримага тортилгани ҳақида хабар берилганди.

 

Чўлпоной Аҳмедова