Чеченистон раҳбари Рамзан Қодиров ўғли Адам Қодировнинг Грознийда содир бўлган авариядан кейинги ҳолати бўйича видео эълон қилди. Видео Телеграм-каналида 17 январь куни жойлаштирилган бўлиб, унда Адам Чеченистон хавфсизлик кучлари раҳбарияти билан йиғилиш ўтказаётганини кўрсатади.
Қодировнинг постида айтилишича, “Чеченистон раҳбари ёрдамчиси, Чеченистон хавфсизлик кенгаши котиби Адам Қодиров менинг топшириғим асосида республика куч тузилмалари қўмондонлари билан йиғилиш ўтказди. Кун тартибида сайловларга тайёргарлик, жамоат хавфсизлигини таъминлаш, экстремизмга қарши кураш ва махсус ҳарбий операция зоналарида фаолият масалалари муҳокама қилинди.”
Маълум бўлишича, 18 ёшли Адам авариядан кейин Грозний шаҳридаги Республика шифохонасига олиб келинган ва реанимация бўлимига ётқизилган. ЙТҲ Қодиров кортежи юқори тезликда ҳаракатланаётганда содир бўлган ва бир неча киши жароҳат олган. Ҳодиса туфайли шифохонага олиб борувчи айрим йўллар вақтинча ёпилган.
Адам Қодиров Чеченистон раҳбарининг фаолиятида муҳим шахс бўлиб, республика хавфсизлик кенгаши котиби, Ички ишлар вазирлиги куратори ва Ғазо секторига инсонпарварлик ёрдами кўрсатиш фонди координатори сифатида ишлайди. Шунингдек, у “Чеченистон қаҳрамони”, «Қодиров» ордени ва бир нечта бошқа мукофотларга сазовор бўлган.