Тошкент метросида яна поезд бузилиб қолди

Ижтимоий тармоқларда Ўзбекистон бекатидаги ҳаракат таркиби бузилиб қолгани тўғрисидаги хабарлар тарқалмоқда. Ҳолат юзасидан “Тошкент метрополитени” ДУК расмий муносабат билдирди.

 

Қайд этилишича, бугун соат 08:48 да «Ўзбекистон» бекатидан ҳаракатланиши лозим бўлган ҳаракат таркибида техник жиҳатдан носозлик кузатилган. Шу боисда ҳам йўловчилар ва ҳаракат хавфсизлигини таъминлаш мақсадида электропоезд машинисти томонидан барча йўловчилар бекатга туширилган ҳамда юзага келган носозликни аниқлаш ҳамда бартараф этиш мақсадида бу ҳаракат таркиби текширув йўлаги томон ҳаракатлантирилган. Шундан сўнг, орадан 3 дақиқа вақт ўтиб, ортдан келган ҳаракат таркиби бекатдаги йўловчиларни олиб манзиллари томон олиб кетган.

 

“Ҳозирги вақтда йўналишдаги поездлар белгиланган жадвал асосида ҳаракатланмоқда. Келтирилган ноқулайликлар юзасидан узр сўраймиз”, дейилади хабарда.

 

Эслатиб ўтамиз, аввалроқ Чилонзор йўналишининг Миллий боғ-Новза перегони эстакасида ҳаракатланаётган 29-сонли ҳаракат таркибида ҳам йўловчилар оқими кўп бўлгани боис техник носозлик ҳолати кузатилганди.