Тошкент халқаро кинофестивалида машҳур режиссёр иштирок этиши кутилмоқда
Кинофестиваль 28 сентябрь – 3 октябрь кунлари бўлиб ўтади ва унда 400 га яқин кинонамояндалар иштирок этади.
Тошкентда 23 сентябрь куни "Ипак йўли марвариди" халқаро кинофестивалига тайёргарлик ишлари бўйича бўлиб ўтган тадбирда фестивалда иштирок этиши кутилаётган машҳур киноижодкорлар ҳақида маълумот берилди.
Кинофестиваль 28 сентябрь – 3 октябрь кунлари бўлиб ўтади. Унда 400 га яқин кинонамоёндалар иштирок этади. Улар қаторида 2014 йилда нуфузли "Кан" кинофестивали ғолиби, "Олтин пальма япроғи" совриндори Нури Билге Жейлан ҳам бор.
Шунингдек, фестивалда россиялик режиссёр ва продюсер, Голливуд кино оламида машҳур ижодкор Тимур Бекмамбетов ҳам иштирок этиши кутилмоқда.
Эслатиб ўтамиз, бундан аввал Тошкент халқаро кинофестивали ғолибларига топшириладиган номинациялар очиқланган эди.
Чўлпоной Аҳмедова
