Тошкент шаҳрида атиги 10 кун давомида жамоат транспортида йўл ҳақини тўламаган қарийб 3 минг нафар йўловчи маъмурий жавобгарликка тортилди. Бу ҳақда Транспорт вазирлиги ахборот хизмати маълум қилди.
Вазирликка кўра, йўл ҳақини тўламасдан ҳаракатланиш ҳолатларини аниқлаш мақсадида махсус инспекторлар иштирокида рейд тадбирлари мунтазам ўтказилмоқда. Назорат тадбирлари автобус, метробус ва бошқа жамоат транспорти турларини қамраб олган.
Транспорт вазирлиги фуқароларни белгиланган тартибга риоя қилишга чақириб, йўл ҳақини ўз вақтида тўлаш жамоат транспорти тизимини барқарор ишлаши ва хизмат сифати ошишига хизмат қилишини таъкидлади. Рейдлар келгусида ҳам давом эттирилиши маълум қилинди.