Тошкент шаҳрининг Янги ҳаёт туманида ҳуқуқни муҳофаза қилувчи органлар томонидан ўтказилган тезкор тадбир давомида йирик миқдордаги гиёҳвандлик воситаларининг ноқонуний муомалага киритилишининг олди олинди. Бу ҳақда Тошкент шаҳар ИИББ матбуот хизмати маълум қилди.
Қайд этилишича, фуқаро Ш.нинг яшаш хонадони холислар иштирокида кўздан кечирилган. Текширув жараёнида ошхона шкафи ичидан гугурт қутиларига жойланган жами 82 дона қадоқ, шунингдек, икки дона пакетда ўсимликсимон модда аниқланган.
Бундан ташқари, 60 дона кичик қадоқ, музлаткичнинг пастки қисмидан эса пакетларга ўралган 10 дона қора рангли ва 90 дона скотч бўлакларига ўралган қора модда топилган. Шунингдек, икки дона пакет ичидан пластилинсимон, жигарранг ва ўткир ҳидли модда ҳам аниқланган.
Дастлабки суриштирувларга кўра, гумонланувчи ушбу гиёҳвандлик воситаларини сотиш мақсадида алоҳида қадоқлаб, ўз хонадонида тайёрлаб келган.
Ҳодиса жойидан тўрт дона тарози, шунингдек, гиёҳванд моддаларни тайёрлашда фойдаланилган қозон ва чўмич ашёвий далил сифатида олиб қўйилган.
Барча топилмалар белгиланган тартибда ҳужжатлаштирилиб, ички ишлар бўлимининг навбатчилик қисмига топширилган. Мазкур ҳолат юзасидан Жиноят кодексининг 273-моддаси 5-қисми билан жиноят иши қўзғатилиб, гумонланувчига нисбатан қамоққа олиш эҳтиёт чораси қўлланган. Ҳозирда дастлабки тергов ҳаракатлари олиб борилмоқда.
Маълумотларга кўра, хонадондан жами 3 килограмм 755 грамм гиёҳвандлик воситалари аниқланган бўлиб, уларнинг умумий қиймати 2 миллиард 29 миллион сўмга баҳоланган. Натижада аҳолига тарқатилиши мумкин бўлган 18 минг 755 дона қадоқдаги гиёҳванд модданинг олди олинди.