АҚШ президенти Доналд Трамп 2028 йилда бўлиб ўтадиган президентлик сайловларида Республикачилар партиясидан иштирок этиши мумкин бўлган номзодлар борлигини маълум қилди. Унинг таъкидлашича, партия ичида салоҳиятли ва тажрибали сиёсатчилардан иборат “яхши таркиб” шаклланган.
Трамп бу ҳақда NewsNation нашрига берган интервьюсида сўзлаб, Республикачилар партиясида етарлича кучли кадрлар захираси мавжудлигини айтди.
“Бизда, албатта, яхши захира ўриндиғи бор. Жуда истеъдодли одамларимиз бор”, — деди АҚШ етакчиси.
Америка президенти ўзининг айрим номзодлари борлигини тан олган бўлсада, сиёсий вазият ўзгариб туриши мумкинлигини инобатга олиб, ҳозирча уларнинг барчасини очиқ эълон қилишга эрта эканини билдирди. Шунга қарамай, Трамп вице-президент Ж.Д. Венс, давлат котиби Марко Рубио ҳамда молия вазири Скотт Бессентни алоҳида таъкидлаб ўтди.
Аввалроқ Доналд Трамп Ж.Д. Венсни келгуси президентлик сайловларида Республикачилар партиясидан номзод бўлиши энг эҳтимолий сиёсатчи сифатида тилга олган эди.