АҚШ президенти Дональд Трамп Туркия етакчиси Ражаб Тоййиб Эрдоғанга расмий таклифнома юборди. Унда Туркия президентини Ғазо сектори бўйича ташкил этилган Тинчлик Кенгашининг асосчи аъзоси сифатида иштирок этишга таклиф қилган. Бу ҳақда Туркия Президенти маъмурияти коммуникациялар департаменти раҳбари Бурҳониддин Дуранга таяниб, TRT Haber маълум қилди.
Дуран сўзларига кўра, БМТ Хавфсизлик Кенгашининг 2803-резолюцияси Доналд Трамп томонидан эълон қилинган Ғазо можаросини якунлаш бўйича кенг қамровли режани қўллаб-қувватлаган. Мазкур режага мувофиқ, хавфсизлик, бошқарув ва қайта қуриш жараёнларини мувофиқлаштирувчи Тинчлик Кенгаши ва унинг таркибий тузилмалари шакллантирилмоқда. Трамп 2026 йил 16 январда Эрдоғанга йўллаган мактубида уни Кенгашнинг асосчи раиси сифатида кўришни исташини билдирган.
Оқ уй эълон қилган рўйхатга кўра, Тинчлик Кенгашида АҚШ давлат котиби Марко Рубио, Трампнинг Яқин Шарқ бўйича махсус вакили Стив Уиткофф, Жаред Кушнер, собиқ Буюк Британия бош вазири Тони Блэр, йирик тадбиркорлар ва АҚШ миллий хавфсизлик тизими вакиллари ҳам бор. Кенгашга шахсан Доналд Трамп раислик қилади.
Шунингдек, Ғазода кундалик бошқарув ва хизматларни мувофиқлаштирувчи Ижроия кенгаши ҳам тузилмоқда. Унинг таркибига Туркия ташқи ишлар вазири Ҳакан Фидан, Қатар, Миср, БАА ва Европа давлатлари вакиллари киритилган. Хавфсизликни таъминлаш учун эса 2027 йил охиригача фаолият юритиши режалаштирилган Халқаро барқарорлик кучлари жойлаштирилади.
Мазкур ташаббус Туркиянинг минтақадаги сиёсий ва дипломатик ролини янада кучайтириши мумкин. Эрдоғаннинг таклифга қандай жавоб бериши эса яқин кунларда маълум бўлиши кутилмоқда.