Доналд Трамп Эрон билан савдо алоқаларини давом эттираётган барча давлатларга нисбатан қатъий савдо чораларини эълон қилди. Унга кўра, Эрон билан бизнес юритаётган ҳар қандай мамлакат Қўшма Штатлар билан амалга ошириладиган барча савдо операцияларида 25 фоизлик тариф тўлашга мажбур бўлади.
Президент бу ҳақда TruthSocial ижтимоий тармоғидаги саҳифасида маълум қилди. Унинг таъкидлашича, мазкур қарор дарҳол кучга киради ҳамда у бўйича ҳеч қандай истиснолар ёки апелляция механизмлари назарда тутилмаган.
Блоомберг агентлиги маълумотига кўра, Эроннинг асосий савдо ҳамкорлари қаторига Ҳиндистон, Хитой ва Туркия киради. Мазкур давлатлар янги тарифлар туфайли АҚШ билан савдо муносабатларида сезиларли иқтисодий босимга дуч келиши мумкин.
Янги савдо чораларига кескин сиёсий риторика ҳамроҳлик қилмоқда. Аввалроқ Доналд Трамп Оқ уй ва АҚШ ҳарбий доиралари Эрондаги норозилик намойишчиларини қўллаб-қувватлаш бўйича турли сценарийларни таҳлил қилаётганини билдирган эди. У, шунингдек, Эрон мухолифати вакиллари билан алоқада эканини ҳам таъкидлаган.
Президент матбуот котиби Керолин Ливиттнинг маълум қилишича, Трамп маъмурияти Эрондаги норозилик намойишларининг зўравонлик билан бостирилиши фонида барча эҳтимолий чораларни кўриб чиқмоқда. Шу билан бирга, у дипломатия АҚШ президентининг устувор ва биринчи танлови бўлиб қолаётганини қайд этди.