Трамп Куба билан боғлиқ вазият сабаб АҚШда фавқулодда ҳолат эълон қилди

Оқ уй томонидан эълон қилинган ижро фармонида қайд этилишича, Куба Республикасидаги вазият АҚШ миллий хавфсизлиги ва ташқи сиёсатига “ғайриоддий ва фавқулодда таҳдид” сифатида баҳоланмоқда. Бу ҳақда Риа новости нашри хабар берди.

 

Фармонда Президент Доналд Трамп Куба ҳукумати Қўшма Штатларга зарар етказувчи ва хавф туғдирувчи чоралар кўраётганини таъкидлаган. Унинг фикрича, Гавана АҚШга душман деб ҳисобланган давлатлар — Россия, Хитой, Эрон, шунингдек Ҳамас ва Ҳизбуллоҳ каби трансмиллий гуруҳлар билан ҳамкорлик қилмоқда.

 

Ҳужжатда қайд этилишича, миллий фавқулодда ҳолат доирасида янги тариф тизими жорий этилиши мумкин. Унга кўра, Кубага тўғридан-тўғри ёки билвосита нефть етказиб берувчи давлатлардан импорт қилинадиган маҳсулотларга қўшимча божлар қўллаш назарда тутилмоқда.

 

Доналд Трампнинг таъкидлашича, Венесуэладан нефть етказиб бериш тўхтатилганидан сўнг Куба иқтисодий жиҳатдан оғир аҳволга тушган. АҚШ раҳбари орол давлати ҳозирда ёқилғи ва молиявий ресурслар бўйича чекланган ҳолатда эканини ва “қулаш арафасида” турганини билдирган.

 

АҚШ Давлат котиби Марко Рубио ҳам Қўшма Штатлар Кубада сиёсий ўзгаришлар бўлишидан манфаатдор эканини айтиб, автократик бошқарувдан воз кечиш Вашингтон манфаатларига мос келишини таъкидлаган.

 

Мазкур фармон билан АҚШ Кубага нисбатан иқтисодий ва сиёсий босим чораларини кучайтириш имкониятини ўзида сақлаб қолмоқда.