Трамп Мадурога Венесуэлани тарк этиш учун бир ҳафталик муддат берди
Мадуро вақтинчалик ҳокимиятни вице-президентга топширишни таклиф қилган бўлсада, Оқ уй буни рад этди.
Реутерс ахборот агентлиги хабарига кўра, 21 ноябрь куни АҚШ президенти Доналд Трамп Венесуэла президенти Николас Мадуро билан ўтказган телефон мулоқоти давомида унга оиласи билан биргаликда мамлакатни тарк этиши учун жума кунигача муддат берган.
Маълум қилинишича, суҳбат 15 дақиқа давом этган бўлиб, Трамп Мадуронинг илгари сурган аксарият таклифларини рад этган. Шунга қарамай, АҚШ раҳбари унга оиласи билан хавфсиз тарзда мамлакатдан чиқиб кетиш учун бир ҳафталик имкон тақдим этишга розилик билдирган. Белгиланган муддат 28 ноябрь, жума куни якунланганидан сўнг, эртаси куни — шанба куни Венесуэла ҳаво ҳудуди ёпилганлиги эълон қилинган.
Агентлик манбаларига кўра, Мадуро вице-президент Делси Родригесга янги сайловлар жараёни вақтида муваққат маъмуриятни бошқариш имкониятини таклиф қилган. СНН нинг ёзишича, Мадуро ўз лавозимини тарк этишга тайёрлигини билдирган, бироқ буни дарҳол амалга ошириш мумкин эмаслигини, 18 ойгача муддат талаб этилишини қайд этган. Телеканалнинг таъкидлашича, АҚШ расмийлари орасида бу таклифни муқобил ечим сифатида кўрувчилар бўлган. Бироқ Оқ уй Венесуэла раҳбарининг зудлик билан истеъфосида қатъий позицияни сақлаб қолган.
