Қирғизистонда Қамчибек Ташиевга яқин шахслар ҳибсга олинди
Собиқ юқори лавозимли амалдорлар ва бизнес вакиллари қўлга олинган.
Қирғизистонда хавфсизлик тизими доирасида кенг кўламли тергов ҳаракатлари олиб борилмоқда. Ҳарбий прокуратура томонидан Миллий хавфсизлик давлат қўмитаси тизимида бир қатор ҳибсга олишлар амалга оширилди. Бу ҳақда 24.kg нашри хабар берди.
Тергов доирасида асосий шахслардан бири сифатида қўмитанинг собиқ раиси ўринбосари Тимур Шабданбеков кўрилмоқда. У мансаб ваколатини суиистеъмол қилишда гумон қилинмоқда.
Мазкур жиноят иши доирасида амалдаги ва собиқ махсус хизмат ходимлари, шунингдек бизнес ва давлат сектори вакиллари ҳам қўлга олинган. Хусусан, Акилбек Маматов ҳамда Бекзат Абдикахаров ҳибсга олинганлар қаторидан жой олган.
Тергов жараёнлари мамлакат хавфсизлик тизимида амалга оширилаётган кенг қамровли ўзгаришлар фонида кечмоқда. Аввалроқ Садир Жапаров томонидан Қамчибек Ташиев лавозимидан озод этилган эди. Шундан сўнг, идора фаолияти юзасидан кенг кўламли аудит бошланган.
ОАВ маълумотларига кўра, ҳибсга олинган шахсларнинг айримлари аввалги раҳбариятга яқин бўлган. Жумладан, айрим бизнес вакилларининг хавфсизлик тизими собиқ раҳбарияти билан узоқ йиллик алоқалари қайд этилмоқда.
Бундан ташқари, ушбу жараёнлар доирасида қўмита раисининг яна бир собиқ ўринбосари — Даниел Рисалиев ҳам ҳибсга олинган, кейинчалик эса уй қамоғига ўтказилган.
Ҳозирда тергов ҳаракатлари давом этмоқда. Ҳарбий прокуратура иш тафсилотларини ошкор этмаяпти, бироқ айрим гумонланувчиларнинг мол-мулки мусодара қилингани маълум қилинган.
