АҚШ президенти Доналд Трамп уни танқид қилаётган айрим Америка телеканалларининг трансляция лицензияларини бекор қилиш масаласини кўтариб чиқди. Бу ҳақда у Truth Social ижтимоий тармоғидаги саҳифасида баёнот берди.
Президентнинг таъкидлашича, айрим телеканалларнинг янгиликлар ва кўнгилочар дастурлари деярли тўлиқ тарзда унинг шахсига, “Make America Great Again” (MAGA) ҳаракати ҳамда Республикачилар партиясига нисбатан салбий руҳда ёритилмоқда.
“Агар телевидение янгиликлари ва уларнинг кечки шоулари Президент Доналд Трамп, MAGA ҳаракати ва Республикачилар партиясига деярли 100 фоиз салбий муносабатда бўлса, уларнинг ниҳоятда қимматли трансляция лицензиялари бекор қилиниши керак эмасми? Менимча, ҳа”, — деб ёзди АҚШ президенти.
Шунингдек, Доналд Трамп CBS, ABC ва NBC телеканалларида эфирга узатиладиган тунги кўнгилочар дастурлар бошловчиларини ҳам танқид остига олди. Унинг фикрича, ушбу бошловчилар истеъдод етишмовчилиги, ҳаддан ташқари юқори гонорарлар ва паст томошабин рейтинглари билан ажралиб туради.