Туркия лимон экспортини вақтинча тўхтатишга қарор қилди
Бунга совуқ об-ҳаво ва ички талаблар сабаб бўлган.
Туркия 8 апрелдан бошлаб хорижга лимон етказиб беришни вақтинча тўхтатишга қарор қилди. Бу ҳақда Туркия Савдо вазирлиги хабар берди, қарор эса Туркия Қишлоқ ва ўрмон хўжалиги вазирлиги билан биргаликда қабул қилинган. Лимон экспортининг тўхтатилиши совуқ об-ҳаво ва ички талабни ҳимоя қилиш, шунингдек, етказиб бериш хавфсизлигини таъминлаш мақсадида амалга оширилмоқда.
Туркия Савдо вазирлиги маълумотларига кўра, сўнгги пайтларда Ўртаер денгизи бўйидаги Адана, Мерсин шаҳарлари ва Хатай вилоятларида совуқ об-ҳаво шароитлари кузатилган, бу эса экспортни вақтинча тўхтатишга олиб келган.
Ўзбекистон, 2024 йилда 3,9 миллион доллар қийматидаги 16,5 минг тонна лимон импорт қилган. Шундан 10 024 тонна лимон Туркиядан келган. Ўзбекистон Туркиядан энг кўп лимон импорт қилган давлатлар орасида биринчи ўринда туради.
2024 йилда Туркия, умумий ҳисобда, 1 миллион 639 минг тонна цитрус меваларини хорижга жўнатган. Россия, 375 миллион доллар қийматидаги экспорт ҳажми билан биринчи ўринда туради, ундан кейин Ироқ, Украина, Руминия ва Полша жой олган.
