Украина халқининг жасорати дунёни илҳомлантирмоқда—Байден
АҚШ Президенти Украина учун яна 1 млрд доллар ажратилишини маълум қилди.
АҚШ президенти Жо Байден Владимир Зеленскийга қўнғироқ қилиб, Украинага хавфсизлик учун яна 1 миллиард доллар ёрдам кўрсатилишини эълон қилди. Бу ҳақда Оқ уй матбуот хизмати маълум қилди.
Президент Байден АҚШ Украинани қўшимча артиллерия ва қирғоқ мудофаа қуроллари, шунингдек, илғор ракета тизимлари учун ўқ-дорилар билан таъминлаётганини ҳам айтиб ўтган.
Бундан ташқари, 225 миллион долларлик гуманитар ёрдам пакети ажратилди. Маблағлар хавфсиз ичимлик суви, зарур тиббий буюмлар, шунингдек, украиналикларни озиқ-овқат, уй-жой ва асосий эҳтиёжлар учун маблағ билан таъминлашга йўналтирилади.
“Украина халқининг жасорати, чидамлилиги ва қатъияти дунёни илҳомлантиришда давом этмоқда. Қўшма Штатлар иттифоқдошларимиз ва ҳамкорларимиз билан ўз озодлиги учун курашаётган Украина халқини қўллашда давом этади”, — деди Оқ уй раҳбари.
