“UzAuto Motors” маълумотни нотўғри талқин қиладиганларга муносабат билдирди
“UzAuto Motors” шу йилнинг 5 октябрида ижтимоий тармоқларда эълон қилинган “Chevrolet Cobalt” автомобили бўёғи билан боғлиқ мақолага муносабат билдирди. У “Фактларнинг бузиб кўрсатилиши” деб номланган.
Унда айтилишича, ҳақиқатдан ҳам бундай ҳолат юз берган. Аммо мақоланинг сарлавҳасида фактлар нотўғри келтирилган. Бўёқ мақола муаллифи ёзганидек, автомобиль кузовидан кўчмаган. Автомобиль кузови ва бамперида ранг тафовути, капотида доғлар пайдо бўлган. Автомобиль эгасининг шикояти 2021 йил 12 августда фотосуратлар, техник ҳисобот қайд этилган ҳолатда ҳужжатлаштирилган (сканер қилинган ҳисобот илова қилинган)
“UzAuto Motors” компанияси ушбу ҳолатни ўрганиб чиқиб, истеъмолчи даъвосини қабул қилган ва автомобиль янгисига алмаштирилган.
Муаммо ўз ечимини топди. Харидор талаби 100 фоиз қондирилди. Энди бошқа бир савол пайдо бўлмоқда. Орадан бир ой вақт ўтгач, ушбу масалани кўтариш, маълумотни нотўғри талқин қилиш, негатив сарлавҳаларни ёзиш кимга ва нимага керак бўлди? Бу “UzAuto Motors” номини булғашга бўлган навбатдаги уруниш экани яққол кўриниб турибди. Нима учун? Хулоса ўзингиздан…– дейилади компания билдирган муносабатда.
Бундан аввал “UzAuto Motors” ижтимоий тармоқлардаги миш-мишларга муносабат билдиргани, янги “Chevrolet Captiva” сотила бошлангани ҳамда Кушербаев Қозоғистон телеканалида “UzAuto Motors” ҳақидаги хабарга муносабат билдиргани ҳақида хабар берилганди.
Юлдуз Рустамова
