Наманган иқтисодиётини 9,5 фоизга ўстириш имконияти бор: инвестициялар 7–8 млрд долларга етиши мумкин
Наманган вилоятида умумий қиймати 5,4 млрд долларлик янги инвестиция таклифлари шакллантирилди.

Президент Шавкат Мирзиёев Наманган вилоятини ривожлантириш, инвестиция лойиҳаларини жадаллаштириш ва аҳоли бандлигини ошириш масалалари юзасидан йиғилиш ўтказди.
Йиғилишда қайд этилишича, 2026 йил якунида Наманган вилоятига жалб этилган хорижий инвестициялар ҳажми 5,4 млрд долларга, экспорт эса 1,2 млрд долларга етиши кутилмоқда.
Келгуси йилда иқтисодий ўсишни 9,5 фоизга етказиш, хорижий инвестициялар ҳажмини 7–8 млрд долларга, экспортни эса 1,3 млрд долларга ошириш имконияти борлиги таъкидланди. Ушбу мақсадлар учун умумий қиймати 5,4 млрд долларлик янги инвестиция таклифлари шакллантирилган. Давлат раҳбари таклифларни аниқ лойиҳаларга айлантириш, инвесторлар учун зарур шароит яратиш ва ташаббуслар ижросини назоратга олиш бўйича топшириқлар берди.
Йиғилишда Наманган халқаро аэропортини кенгайтириш ва модернизация қилиш лойиҳаси ҳам тақдим этилди. Унга кўра, соатига 1,2 минг йўловчига хизмат кўрсатадиган янги терминал ҳамда йилига 21,2 минг тонна юкни қабул қилиш қувватига эга карго инфратузилмаси барпо этилмоқда. Саноат соҳасида Чуст туманида 260 млн долларлик тўқимачилик бўёқлари ишлаб чиқариш, 150 млн долларлик чиқиндилардан электр энергияси олиш ва 125 млн долларлик базальтдан иссиқлик сақловчи материаллар тайёрлаш лойиҳалари амалга оширилмоқда.
Шунингдек, Поп туманида кумуш концентрати, Янги Наманганда эса фармацевтика маҳсулотлари ишлаб чиқариш қувватларини ташкил этиш режалаштирилган. Янги Наманган шаҳарчасида замонавий IT-парк биносини қуриш ҳам кўзда тутилган. Унда ўнлаб технологик корхоналар фаолият юритиши режалаштирилмоқда.
Бундан ташқари, Янги Наманган шаҳарчасида 50 минг хонадонга мўлжалланган турар жойлар, ижтимоий ва хизмат кўрсатиш объектларини барпо этиш лойиҳаси амалга оширилмоқда.
Йиғилишда вилоятдаги 183 минг гектар ер салоҳиятидан самарали фойдаланиш, қишлоқ хўжалиги маҳсулотларини чуқур қайта ишлаш ва агросаноат кооперациясини ривожлантириш масалаларига ҳам эътибор қаратилди. Хусусан, Тўрақўрғон туманида 70 минг бош қўйга мўлжалланган замонавий кластер фаолияти, бир қатор туманларда паррандачилик мажмуаларини ривожлантириш ишлари кўриб чиқилди. Косонсой туманида эса 25 минг бош қорамолга мўлжалланган йирик чорвачилик комплексини барпо этиш режаси муҳокама қилинди.
Чуст туманидаги Олмос шаҳарчасида деҳқончилик мактабини ташкил этиш ташаббуси ҳам тақдим этилди. Унда агроакадемия, агроинновация маркази, агросаноат парки, агрологистика ва агротуризм йўналишларини бирлаштириш таклиф этилган.
Шунингдек, хорижий ҳамкорлар билан юқори ҳосилли картошка уруғчилиги, экспортбоп полиз маҳсулотлари етиштириш ва наслчиликни ривожлантириш режалаштирилмоқда. Интенсив ва органик боғдорчиликни кенгайтириш, Поп тумани адирларини ўзлаштириш, қишлоқ хўжалигига илм-фан ютуқлари ва илғор хорижий тажрибани жорий этиш бўйича топшириқлар берилди.








