Венесуэла президенти Николас Мадуронинг ўғли, Николас Эрнесто Мадуро Гуэрра, отаси Қўшма Штатлар томонидан қўлга олинганидан кейин унга мурожаат қилди. Маълумотларга кўра, Мадуро Гуэрра ўзининг биринчи жамоат нутқида меҳрибон ота сифатида отасини мадҳ этиб, оиланинг бирлиги ва Ватаннинг келажаги ҳақида фикр билдирди. Бу ҳақда lenta.ru хабар берди.
У парламент қароргоҳида қилган чиқишида шундай деди: “Ота, сиз оиламиздаги барчани кучли инсонларга айлантирдингиз. Биз сиз қайтгунингизча ўз бурчимизни бажаряпмиз. Ватан ишончли қўлларда. Ва тез орада биз Венесуэлада бир-биримизни қучоқлаймиз”.
Мадуро Гуэрра шунингдек, Венесуэланинг амалдаги вақтинча раҳбари — вице-президент Делси Родригесни ҳам қўллаб-қувватлашини билдирган. У ўз мурожаатида оиласига, шунингдек халқига ишонганини айтган.
Венесуэла етакчиси Николас Мадуро ва унинг рафиқаси Силия Флорес АҚШда қўлга олинганидан сўнг, улар Нью-Йорк шаҳридаги федерал суд мажлисида айбловларни рад этган. Кейинги суд тинглови 2026 йил 17 март куни бўлиб ўтади.