Хоразм вилоятида нодавлат мактабгача таълим муассасаси раҳбарлари томонидан давлат субсидияларини ноқонуний ўзлаштириш ҳолати аниқланиб, айбдор шахслар жиноий жавобгарликка тортилди. Бу ҳақда Kun.uz хабар берди.
Суд ҳужжатларида қайд этилишича, 1965 йилда туғилган З.Й Шовот туманида фаолият юритган нодавлат мактабгача таълим ташкилоти раҳбари бўлиб ишлаган. У 2019 йил 6 май куни Мактабгача таълим вазирлиги билан давлат-хусусий шериклик асосида битим тузган.
З.Й. 2023 йилда 12 нафар, 2024 йилда 19 нафар ҳамда 2025 йилда 12 нафар, амалда ушбу боғчага қатнамаган болаларни тарбияланувчи сифатида расмийлаштирган. Шунингдек, у 2 нафар вафот этган болани ҳам рўйхатга киритиб, махсус онлайн платформага сохта маълумотлар юклаган. Натижада давлат буджетидан 70 миллион сўм субсидия ажратилишига эришиб, ушбу маблағларни шахсий эҳтиёжлари учун сарфлаган.
Бундан ташқари, З.Й. 2021 йил 14 февраль куни турмуш ўртоғи Р.A. номига Шовот туманида оилавий боғча ташкил қилган. 2022 йил 30 августда эса Мактабгача таълим вазирлиги билан яна бир давлат-хусусий шериклик битими тузилган. Суд материалларига кўра, эр-хотин 2023 йилда 15 нафар, 2024 йилда 38 нафар ҳамда 2 нафар вафот этган болани ҳақиқатда боғчага қатнамаган бўлсада, тарбияланувчи сифатида кўрсатган. Шу йўл билан 91 миллион сўм субсидия маблағлари талон-торож қилинган.
Суд жараёнида айбланувчилар айбларга қисман иқрор бўлган. Уларнинг айби гувоҳларнинг кўрсатмалари, мутахассислар хулосалари ва бошқа далиллар билан тасдиқланган. Жумладан, судда сўроқ қилинган ота-оналар фарзандлари мазкур боғчаларга қатнамаганини, ҳатто ушбу муассасалар қаерда жойлашганидан ҳам бехабар бўлганини билдирган.
Жиноят ишлари бўйича Гурлан туман суди ҳукмига кўра, З.Й. ва Р.A. ўзлаштириш ёки растрата йўли билан талон-торож қилиш, шунингдек, ҳужжатларни қалбакилаштириш жиноятларида айбли деб топилган. Уларга 2 йил 6 ой муддатга озодликни чеклаш жазоси, шунингдек, 1 йил давомида давлат иштирокидаги ташкилотларда мансабдор ва моддий жавобгар лавозимларда ишлаш ҳуқуқидан маҳрум этиш жазоси тайинланган.
Бундан ташқари, етказилган моддий зарарни қоплаш мақсадида эр-хотиндан давлат фойдасига солидар тартибда жами 161 миллион сўм ундирилиши белгиланган. Хоразм вилоят суди жиноят ишлари бўйича судлов ҳайъатининг 2026 йил 20 январдаги ажрими билан ушбу ҳукм ўзгаришсиз қолдирилган.