1 октабрдан бошлаб Япония, Тоёакэ шаҳрида аҳолига иш ёки мактабдан ташқари кунига атиги икки соат мобил телефон, планшет, ўйин приставкалари ва компьютерлардан фойдаланишга рухсат берилди.
Шаҳар мэри Масафуми Куоки мактаб ўқувчиларининг мобил қурилмаларга қарамлиги ошгани сабабли бундай чеклов жорий этилганини билдирган. Мэрнинг мақсади ёшлар орасида технологияга қарамликни камайтириш ва соғлом турмуш тарзини рағбатлантиришдир.
Қайд этилишича, янги қоида рамзий аҳамиятга эга бўлиб, уни назорат қилиш ёки жарима қўллаш кўзда тутилмаган. Шу билан бирга, аҳолига технологиядан меъёрида фойдаланиш ва вақтини самарали ташкил этиш тавсия этилади.