Эронга парвозлар тўхтатилди: Туркиянинг учта авиакомпанияси қарор қабул қилди
Туркиянинг Turkish Airlines, AJet ва Pegasus авиакомпаниялари 21 сентябрдан Эронга ва Эрондан амалга ошириладиган рейсларни тўхтатди. Бу АҚШнинг Эрон авиация секторига нисбатан янги санкциялари кучга кириши фонида юз берди.
Turkish Airlines (ТHY), AJet ва Pegasus авиакомпанияларининг Эронга амалга ошириладиган айрим рейслари 21 сентябрдан бошлаб сотувдан олиб ташланган ёки бекор қилинган. Бу ҳақда Middle East Eye нашри авиакомпанияларнинг бронь қилиш тизимларини таҳлил қилган ҳолда хабар берди.
Қайд этилишича, АҚШнинг Эрон авиация секторига қарши янги санкциялари ортидан бундай чоралар кўрилган. Санкциялар АҚШда ишлаб чиқарилган эҳтиёт қисмлар мавжуд бўлган самолётларнинг Эронга парвозлари учун ҳам хавф туғдириши мумкин.
THY томонидан бу борада ҳозирча расмий баёнот берилмаган. Middle East Eye маълумотига кўра, THY ва AJet тизимларида узоқ муддатли Эрон рейслари мавжуд эмас, Pegasus эса Эрон йўналишларини бронь қилиш тизимидан олиб ташлаган.
THY сайтида 2026 йил сентябридан 2027 йил февралигача Теҳрондан Туркиянинг айрим шаҳарлари томон мос рейслар кўрсатилмаяпти. Бироқ бронь тизимлари тез-тез янгиланиб туриши сабабли рейсларнинг бекор қилиниши қанча муддат давом этиши авиакомпанияларнинг расмий баёнотларидан кейин аниқ бўлиши мумкин.
АҚШ Молия вазирлиги 8 сентябрь куни Эрон авиация секторига қарши янги санкцияларни эълон қилган. Хорижий активларни назорат қилиш бошқармаси Эрон авиация секторини қўллаб-қувватлагани сабаб 36 нафар шахс ва ташкилотни санкциялар рўйхатига киритган. Улар орасида Эронда фаолият юритувчи 27 та авиакомпания ҳам бор.
АҚШ томони Эрон авиация тармоғидан қурол, ходимлар ва санкциялар доирасидаги технологияларни ташишда фойдаланилаётганини таъкидлаган. Шунингдек, Вашингтон Эроннинг учинчи давлатлар орқали АҚШда ишлаб чиқарилган самолётлар, эҳтиёт қисмлар ва технологияларга киришини чеклашни мақсад қилган.
Middle East Eye суҳбатлашган манбага кўра, бу чекловлар фақат Boeing каби АҚШда ишлаб чиқарилган самолётларга тааллуқли эмас. Airbus самолётларида ҳам АҚШда ишлаб чиқарилган эҳтиёт қисмлар ва тизимлар мавжудлиги сабабли улар билан Эронга парвоз қилувчи авиакомпаниялар учун санкция ва экспорт назорати хавфи юзага келиши мумкин.
