Японияга тропик бўрон ёпирилди
Оқибатда айрим йўллар ёпилган ва бир қатор ҳудудларда электр таъминоти узилган.
“Меари” тропик бўрони Япония қирғоқларига етиб келди, деб ёзмоқда “The Japan Times” нашри.
Хабарда айтилишича, Токио, Канто Кошин, Тохоку минтақасида шамол тезлиги 108 километр/соатга етган. Бунинг таъсирида баъзи тезюрар поездлар ва самолётлар парвозлари бекор қилинган. 12 мингга яқин одам аэропортларда қолиб кетган. Бир қанча шаҳарлараро автомагистраллар ёпилган.
Шидзуока шаҳрида кучли ёмғир туфайли 72 минг киши эвакуация қилинишига тўғри келди. Бундан ташқари, бир қатор ҳудудларда электр таъминоти узилган. Мамлакат метеорология хизмати қирғоқларда кучли ёмғир, шамол ва бўронли тўлқинлар, шунингдек, кўчкилар, сув тошқини юз бериши ҳақида огоҳлантирмоқда.
