Европа Иттифоқи Россияга кўрсатилаётган ёрдам сабабли Қирғизистонга қарши илк бор санкциялар жорий этиш масаласини кўриб чиқмоқда. Бу ҳақда Bloomberg хабар берди.
Манбаларга кўра, мазкур чоралар Россиянинг Украинага бостириб кириши билан боғлиқ санкцияларнинг 20-босқичи доирасида муҳокама қилинмоқда. Агар қарор қабул қилинса, Қирғизистон Россияга ёрдам бергани учун Европа санкцияларига дуч келган биринчи собиқ Совет республикаси бўлиши мумкин.
Bloomberg маълумотларига кўра, санкциялар Россияга қарши жорий этилган чекловларни четлаб ўтишга қарши қаратилади. Хусусан, Қирғизистонга станоклар ва радиоэлектрон ускуналар етказиб беришни тақиқлаш режалаштирилмоқда. Бу каби чоралар илк бор Евроосиё иқтисодий иттифоқи (ЕОИИ) ва КХШТ аъзоси бўлган Марказий Осиё давлатига нисбатан қўлланиши мумкин.
Таҳлилларга кўра, уруш бошланганидан буён Қирғизистон Европадан Россияга санкцияланган товарлар қайта йўналтириладиган муҳим савдо марказига айланган. Brookings институти ҳисоб-китобларига кўра, Европа давлатларидан Қирғизистонга экспорт ҳажми кескин ошган.
Шунингдек, Bloomberg маълумотига кўра, янги санкциялар пакети Россия банклари, нефть компаниялари, криптовалюта хизматлари ва учинчи мамлакатлардаги молиявий институтларга нисбатан қўшимча чекловларни ҳам ўз ичига олиши мумкин.
Бундан ташқари, Европа Иттифоқи Россия нефтини денгиз орқали ташишни тўлиқ тақиқлаш масаласини ҳам муҳокама қилмоқда. Бу ҳозир амалда бўлган “нарх чегараси” механизмини алмаштириши мумкин. 1 февралдан бошлаб мазкур нарх чегараси бир баррель учун 44,1 доллар этиб белгиланган.