Юн Сок Ёль КХДР ядро дастурини дунёга чақириқ сифатида баҳолади
Жанубий Корея раҳбари Пхеньян томондан таҳдидлар кучайганини таъкидлаган.
КХДР навбатдаги ядро синовларига тайёргарликни якунлади. Бу ҳақда Жанубий Корея Президенти Юн Сок Ёль маълум қилди.
“Шимолий Корея нафақат ядро қуролидан биринчи бўлиб фойдаланишини очиқ айтди, балки, катта эҳтимол билан ядро синовларига тайёргарликни якунлади”, – деган Президент мамлакат парламентидаги чиқишида.
Унинг қўшимча қилишича, Пхеньян тўхтовсиз равишда баллистик ракеталар учиришда давом этмоқда ва бу каби интенсивлик аввал кузатилмаган. Юн Сок Ёль ракета синовларини халқаро ҳамжамиятга чақириқ сифатида баҳолаган.
КХДР томондан келаётган таҳдидга қарши Жанубий Корея етакчиси АҚШ ва Япония билан мудофаа соҳасида ҳамкорликни кенгайтиришини таъкидлаган. Шу билан бирга шимолликлар ядро дастуридан воз кечган тақдирда Сеул қўшнисига катта иқтисодий ёрдам ваъда қилган.
Аввалроқ Жанубий Корея АҚШ ядро қуролидан биргаликда фойдаланишни таклиф қилганди.
