Bosh og‘rig‘i koronavirusning yagona belgisi bo‘lishi mumkin — britaniyalik olimlar

Koronavirus infeksiyasi aksariyat hollarda bosh og‘rig‘ini yuzaga keltirmoqda. Ayrim bemorlar kasallikning faqat shu belgisini his qilmoqda. London qirollik kolleji genetik epidemiologi, professor Timoti Spektor bosh og‘rig‘i orqali organizmdagi infeksiyani aniqlash haqida maʼlumot berdi, deb yozadi “Korrespondent.net”.

Uning taʼkidlashicha, koronavirusning yangi shtammlari bilan kasallanganlarning uchdan ikki qismi bosh og‘rig‘idan shikoyat qilmoqda. Shu bilan birga, bemorlarning 15 foizida bosh og‘rig‘i — mazkur kasallikning yagona belgisi.

Koronavirus tashxisi qo‘yilgan bemorlarning aksariyati analgetiklar bilan bartaraf etishning imkoni bo‘lmagan o‘rtacha va qattiq og‘riqni his qilmoqda. Og‘riq boshning ikki tomonida ham kuzatilib, uch—besh kun davom etyapti. U pulsatsiyalanuvchi, bosimli yoki o‘tkir bo‘lishi mumkin.

Bundan tashqari, britaniyalik olimlar koronavirusning hozirda butun dunyo bo‘ylab tarqalgan delta shtammining belgilarini izohlar ekan, uni oddiy shamollashga o‘xshashini taʼkidlamoqda. Yaʼni asosiy begilari orasida bosh va tomoqda o‘riq, shuningdek, tumov, aksirish va yo‘tal kuzatilyapti.